Interstellar - ஹாலிவுட் தங்கமீன்கள் ( Tamil review / Decoding / explanation )

#Interstellar பற்றி ஒரு பெரிய பதிவு எழுத வேண்டும் என்று ரொம்ப நாட்களாகவே ரொம்ப வருஷமாகவே நினைத்துக்கொண்டு இருந்தது.
சரியான நேரம் கிடைக்காததால் இத்தனை தாமதம்.
இந்த படத்தின் அறிவியல் பற்றி பல பதிவுகளில் படித்தும் யூட்யூப் வீடியோக்களாக பார்த்தும் கொஞ்சம் தெளிந்திருப்பீர்கள் அல்லது மேலும் நிறையவே குழம்பியிருப்பீர்கள்.
அதனால் அந்த black hole, wormhole, time dilation கருமங்களை பற்றியெல்லாம் மேலும் பேச வேண்டாம் என்று நினைக்கிறேன்.
எனவே
அதை தாண்டிய அந்த படத்தின் psychological philosophical & emotional layers பற்றிய பதிவாக தான் இது இருக்கப்போகிறது.

முதல் நாள் முதல் காட்சி பார்த்து விட்டு வந்து அது ஒரு ஹாலிவுட் தங்க மீன்கள் என்று ட்விட்டரில் எழுதியது நியாபகம் இருக்கிறது.
அதற்கு பிறகு அந்த படத்தை 50 முறையோ அல்லது அதற்கு மேலுமோ பார்த்திருப்பேன்.
இத்தனை முறைக்கு பிறகு அதன் அறிவியல் பற்றிய புரிதல் பல கோணங்களில் மாறிவிட்டது ஆனால் இன்னும் அதற்கு அளிக்கப்பட்ட அந்த தங்கமீன்கள் அந்தஸ்து கொஞ்சமும் குறைந்ததாய் இல்லை.

பூமி வளிமண்டலத்தில் 80% நைட்ரஜன் தான் இருக்கிறது. மனிதர்களால் அதை சுவாசிக்க முடியாது. ஆனால் கருகல் நோய் அதை சுவாசித்தே வளர்கிறது.
அதனால்
நோய் வேகமாக பரவுவது மட்டுமின்றி வளிமண்டலத்தின் ஆக்ஸிஜன் அளவையும் வெகுவாக குறைத்து வருகிறது மற்றும் கிட்டத்தட்ட எல்லா தானியங்களும் இந்த நோயால் அழிந்துவிட்டன.
மிச்சமிருப்பது சோளம் மட்டுமே. அதுவும் இன்னும் கொஞ்ச நாட்களில் கருகல் நோயில் அழிந்து விடப்போகிறது.
எங்கு பார்த்தாலும் புழுதிப்புயல். எல்லாவற்றிலும் புழுதி படிந்து இருக்கிறது.
ஆக்ஸிஜன் அளவு குறைந்து வருவதால் பூமி கொஞ்சம் கொஞ்சமாக மனிதர்கள் வாழும் கிரகம் எனும் தகுதியை இழந்து கொண்டிருக்கிறது.
இந்த காலகட்டத்திலான மக்களின் பிரதான தொழிலாக விவசாயமே இருக்கிறது. நாசாவின் முன்னால் ஆஸ்ட்ரோ பைலட்டான கூப்பர் தனது மகன் மகள் மாமனாரோடு பண்ணையில் விவசாயம் செய்து வசித்து வருகிறான்.

Christopher மற்றும் Jonathan nolanன் திரைக்கதை அமைப்பானது மிகவும் நுட்பமானது.
கதையின் இரண்டாம் பாதியில் நாம் சந்திக்கப் போகும் மிகப்பெரிய ட்விஸ்ட்களுக்கான அடித்தளத்தளத்தை படத்தின் முற்பாதியிலியே சுவற்றில் ஒட்டி வைக்கும் reminder slip போல ஆங்காங்கே முன்னரே ஒட்டி செல்வது வழக்கம்.
அப்படி தான் இந்த படத்தின் முதல் 20-30நிமிட காட்சிகள் special ஆகிறது.
இந்த படத்தின் திரைக்கதை அமைப்பு
1-2-3-4-5-4D-3C-2B-1A என்ற ஆர்டரில் அமைக்கப்பட்டு இருப்பதை கவனிக்கலாம்.
படத்தின் காட்சி 1A நிகழ்வதற்கான காரணம் 1லும், 2Bக்கான காரணம் 2விலும் இப்படி ஒவ்வொரு காட்சியும் ஆர்டர் ஆகியிருப்பதை கவனிக்கலாம்.

#1-1A
Date : April 14 unknown year.
கூப்பர் ஓட்டி செல்லும் விமானம் விபத்துக்குள்ளாகிறது.
பல வருடங்களுக்கு முன்பு நடந்த அந்த சம்பவம் கூப்பருக்கு அடிக்கடி கனவாக வந்து தொந்தரவு செய்கிறது.
இன்றும் அப்படியொரு கனவிலிருந்து விழிக்கிறான் கூப்பர்.

மர்ஃபியின் முதல் வசனம்.
தூங்கி எழும் தந்தையிடம் "நீங்கள் தான் அந்த பேய் என்று நினைத்தேன்" என்கிறாள்.
ஆரம்பத்திலிருந்தே தன் அறையில் நிகழும் அமானுஷ்ய சம்பவங்களுக்கும் தன் தந்தைக்கும் ஏதோ ஒரு தொடர்பு இருப்பதாக partialஆக நம்பியே வருகிறாள் மர்ஃபி.
பிறகு சாப்பிட அமரும் கூப்பரிடம் அறையில் தானாக கீழே விழும் பொருட்களை பேய் தள்ளி விடுவதாக கூறுகிறாள்.
அவளின் நம்பிக்கையை கிண்டல் செய்யும் தன் அண்ணனிடம் இயற்கைக்கு புறம்பானதாக நாம் கருதுவதே அறிவியல் என்றும் வாதிடுகிறாள்.
அதற்கு கூப்பர் "ஒரு நிகழ்வு எப்படி ஏன் நிகழ்ந்தது என்று ஆராய்ந்து பின் ஒரு முடிவுக்கு வர வேண்டும் அதுவே அறிவியல், அதை செய்யும் முன் நாமாகவே இது அது என்று முடிவு செய்வது அறிவியல் அல்ல" என்று விளக்கமளிக்கிறான்.
பிற்காலத்தில் கூப்பர் தரும் கோஆர்டிநேட் தகவல்களை மர்ஃபி பேயென்று ஒதுக்கிவிடாமல் அதை அறிவியலாகவும் தன் தந்தையாகவும் ஏன் அணுகினாள் என்பதற்கு இந்த சம்பவம் ஒரு அடித்தளமாகிறது.

பிறகு பள்ளிக்கு செல்கையில் பஞ்சர் ஆகும் வண்டியின் டயரை மகனிடம் பஞ்சர் போட சொல்கிறான் கூப்பர்.
அலுத்துக்கொள்பவனிடம் உனக்கு உதவ எப்போதும் நான் உன்னுடனே இருக்க முடியாது என்கிறான்.
வண்டி ஓட்டும்போது தன் கட்டளையை மட்டுமே பின்பற்றும் மகனை நான் சொல்வதை மட்டுமே கேட்டு நடக்காதே இடத்திற்கு தகுந்தவாறு மாறி உன் வாழ்க்கையை நீயே தனியாக சுயமாக வாழ பழகிக்கொள் என்று பிற்காலத்தில் தான் இன்றி தனியே வாழப்போகும் மகனுக்குஎதிர்க்கொள்ளுதலை கற்றுக்கொடுக்கிறான் கூப்பர்.
பின்னர் பயணம் செல்லும் கூப்பர் தங்கையையும் பண்ணையையும் அவனுக்கு பிடித்த அந்த ட்ரக்கையும் மகனிடமே ஒப்படைத்து செல்கிறான்.
அவற்றை அவன் பத்திரமாக பாதுகாப்பான் என்றும் நம்புகிறான்.

பெற்றோர் ஆசிரியர் கலந்தாய்வுக்கு செல்லும் கூப்பரிடம் மர்ஃபி பற்றி புகார் அளிக்கிறார் ஆசிரியர்.
நிலவில் அமெரிக்கர்கள் தரையிறங்கியது சோவியத் யூனியனை விண்வெளி ஆராய்ச்சிக்காக செலவு செய்யவைத்து திவாலாக எடுத்த யுக்தி என்று தற்போதைய மக்கள் கருதுகின்றனர். அதுவே பாடப்புத்தகம் ஆகவும் இருக்கிறது. அதுமட்டுமின்றி அழிந்து வரும் தருவாயில் இருக்கும் பூமியின் நிலையைப் பற்றியும், பூமியில் இருந்தபடியே அதன் சூழ்நிலைகளை கையாளுவதை பற்றியும் மட்டுமே குழந்தைகள் சிந்திக்கவும் பயிலவும் வேண்டுமே தவிர, நிலவில் தரை இறங்கிய பொய்யான(அவர்களை பொருத்த வரை) சம்பவங்களைப் பற்றி பேசி பூமியை விட்டு வேறு கிரகத்திற்கு ஓடுவது பற்றியான முட்டாள்த்தனமான விஷயங்களை யோசிக்க கூடாது என்று நினைக்கின்றனர்.
அவர்களைப் பொறுத்தவரையில் சர்வைவல் என்பது அழிந்து கொண்டிருக்கும் பூமியில் இருந்தபடியே இங்குள்ள சூழ்நிலைகளை எதிர்கொள்வது தானே தவிர அதற்கு மாற்றாக யோசிப்பது அல்ல.
அந்த காரணத்தினாலேயே நன்றாக படிக்கும் கூப்பரின் மகனையும் என்ஜினியராக விடாமல் விவசாயி ஆக சொல்கிறார் ஆசிரியர்.
தற்போது உள்ள சூழ்நிலையில் இன்ஜினியர்களால் எந்த ஒரு மாற்றமும் நிகழப் போவதில்லை என்று தீர்க்கமாக நம்புகின்றனர் மக்கள்.
ஆனால் மர்பியோ வேறு கிரகத்திற்கு (நிலாவிற்கு) மனிதர்கள் சென்றது பொய்யென்று நம்பிக் கொண்டிருக்கும் குழந்தைகளுக்கு மத்தியில் அதை உண்மை என்று நம்புகிறாள்.
தந்தையான கூப்பரும் தன் மகளுக்கு அதையே பயிற்றுவிக்கிறான்.
வேறு கிரகத்திற்கு பயணப்படுவது பற்றிய சிந்தனை அவளிடம் சிறு வயதிலிருந்தே தீர்க்கமாகவே இருப்பதையும் அதை கூப்பரே அவளுக்குள் விதைக்கிறான் என்பதையும் இந்த காட்சி காட்டுகிறது.

பள்ளியிலிருந்து வீடு திரும்பும் கூப்பர் வீட்டருகே மற்றொரு விஷயத்தை காண்கிறான்.
பண்ணையில் ஓடும் தானியங்கி டர்க்குகள் அனைத்தும் அவன் வீட்டை நோக்கி வந்து நிற்கிறது.
திசைகாட்டியில் ஏதோ காந்தவியல் கோளாறு ஏற்பட்டிருக்கலாம் என்று சந்தேகப்படுகிறான் கூப்பர்.
அதை சரி செய்து விட்டு வீட்டுக்குள் நுழைகையில் மீண்டும் அலமாரியில் இருந்து புத்தகங்கள் கீழே விழுகின்றன.
டிரக்குகளில் நிகழ்ந்தது ஒரு தானியங்கி திசைக்காட்டி கோளாறு என்று கருதுகிறான் கூப்பர்.
ஆனால் உண்மையில் அங்கு நடந்தது ஒரு கிரவிடேஷனல் முரண்பாடு.
அதுவே ட்ரக்குகளை தன் வீடு நோக்கி இழுத்திருக்கிறது.
பத்து ஆண்டுகளுக்கு மேலாக டெல்லி கட்டுப்பாட்டை இழந்து வளிமண்டலத்துக்கு மேலே பறந்துக்கொண்டு இருந்த இந்திய கண்காணிப்பு ட்ரோன் திடீரென தாழ்வாரத்தில் பறந்ததற்கும் இதுவே காரணம்.
அதற்கான உறுதிப்பாடும் அடுத்த நாளே அவனுக்கு கிடைக்கிறது.

#April 15
மறுநாள் தன் குடும்பத்தோடு பேஸ்பால் விளையாட்டு பார்த்துக்கொண்டிருக்கிறான் கூப்பர். மிகப்பெரிய புழுதிப்புயல் அன்று நகரத்தை தாக்குகிறது.
வீட்டுக்கு செல்கையில் தன் மகளின் அறையில் புழுதிகளால் தரையில் சில கோடுகள் உருவாகியிருப்பதை காண்கிறான்.
அதை பேய் என்கிறாள் மர்ஃபி.
அது ஒரு இடத்திற்கான ஜியாக்ரஃபிகல் பைனரி கோட்ஸ் என்றும் அது சில புவியீர்ப்பு முரண்பாடுகளால் அங்கு உருவாகியிருப்பதையும் கண்டறிகிறான் கூப்பர்.
அந்த இடத்தை தேடியும் செல்கிறான்.

அவர்கள் அடைந்த அந்த கோஆர்டினேட்ஸுக்கான இடத்தில் கூப்பரையும் மர்ஃபியையும் சிறை பிடிக்கிறது டார்ஸ்.
(TARS என்பது அப்போதைய கடற்படையை சேர்ந்த ஒரு Artificial intelligence robot, பிற்காலத்தில் navy armyகள் இல்லாததால் அது தற்போது நாசாவில் பணிபுரிந்து வருகிறது)
பின்பு கூப்பருக்கு அது நாசாவின் ரகசிய ஆய்விடம் என்று தெரிய வருகிறது.
தற்போதைய நாசாவின் ஆய்வு தலைவர் ஆலோசகர் மற்றும் தன் பழைய நண்பரான டாக்டர் ப்ரஃபசர் பிராண்டை சந்திக்கிறான் கூப்பர்.
தாம் எப்படி இங்கே வந்தோம் என்பதையும் விவரிக்கிறான்.

சில வருடங்களுக்கு முன் மக்கள் தொகை பெருக்கத்தால் அமெரிக்காவில் ஒரு மிகப்பெரிய உள்நாட்டு போர் நடந்திருக்கிறது.
மக்கள் ஒருவருக்கொருவர் உணவுக்காக படுகொலைகள் செய்துக்கொண்டு இருந்திருக்கின்றனர்.
அந்த போரை அமெரிக்க அரசாங்கமும் ஒரு தலையாக ஆதரித்திருக்கிறது.
அதற்கு உதவ மறுத்த காரணத்தாலேயே அமெரிக்க அரசால் நாசா மூடப்பட்டது.
பின்பு சில வருடங்களுக்கு பிறகு தன் தவறை உணர்ந்த அமெரிக்க அரசு நாசாவை மீண்டும் தொடங்கி ரகசியமாக நடத்தி வருகிறது.

அழிந்துக்கொண்டிருக்கும் பூமியிலிருந்து வேறு கிரகத்திற்கு செல்வதற்கான ஆய்வு முயற்சிகள் நடந்துக் கொண்டு இருப்பதாக சொல்லும் பிராண்ட்,
லாசரஸ் மிஷன் என்று பெயரிடப்பட்ட அந்த மிஷினில் பங்கு கொள்ளவும் கூப்பரை அழைக்கிறார்.
(லாசரஸ் என்பவர் இறந்த நான்கு நாட்களுக்கு பிறகு ஏசுவால் உயிர்த்தெழுப்பப்பட்டு இரண்டாம் ஆயுள் பெற்றவர், அதுபோல் இறந்துக் கொண்டிருக்கும் பூமியிலிருக்கும் மக்கள் உயிர் பிழைக்க எடுக்கும் இரண்டாவது முயற்சி எனும் பொருளில் இந்த பெயர் இடப்பட்டிருக்கிறது)

இறந்துக் கொண்டிருக்கும் பூமியை எந்த வகையிலும் இனி காப்பாற்ற முடியாது,
இங்கிருந்து வேறு கிரகத்திற்கு புறப்படுவதே ஒரே வழி.
எங்களுக்கு உதவி, உன் மகளும் அவள் சந்ததியும் உயிர் பிழைத்திருக்க உதவுமாறு சொல்கிறார் பிராண்ட்.
(இந்த மிஷினில் கூப்பர் நிச்சயம் இருக்க வேண்டும் என்று நிறைக்கிறார் பிராண்ட்.
அதற்கு ஒரு காரணமும் இருக்கிறது.)
தன் மகளின் எதிர்காலம் கருதி மிஷினில் பங்கு கொள்வதாக ஏற்றுக்கொள்கிறான் கூப்பர்.

ஒப்புக்கொள்ளும் கூப்பரிடம் மிஷனை பற்றி விளக்குகிளார் பிராண்ட்.
பூமியின் வளிமண்டலத்தில் 50+ ஆண்டுகளாக சில gravitational anomaly இருக்கிறது.
(கூப்பரின் விமான விபத்து ஏற்பட காரணமும் இப்படி ஒரு புவியீர்ப்பு முரண் தான்)
சின்னச்சினதாக ஆங்காங்கே தெரியும் அதன் அறிகுறிகளை தாண்டி ஒரு பெரிய முரண் சனி கிரகத்தின் அருகே கண்டுபிடிக்கப்பட்டிருக்கிறது.
ஒரு புழுத்துளை(wormhole).
சூரிய கிரகத்திலிருந்து வேறொரு கேலக்ஸிக்கு வழிக்காட்டும் அந்த துளையை யாரோ அங்கு வைத்திருக்கின்றனர்.
அழியும் தருவாயில் இருக்கும் பூமியருகே, உயிர்வாழ கடைசி முயற்சி எடுத்துக்கொண்டு மனிதகுலத்திற்கு எட்டும் தூரத்தில் அமைந்திருப்பதால் இது மனிதர்களுக்காகவே அமைக்கப்பட்டது என்று நம்புகிறார் பிராண்ட்.

எல்லாமே நேரம் சம்மந்தப்பட்டது.
எது எந்த நேரத்தில் யாரால் எங்கு நடக்க வேண்டுமோ அது அந்த நேரத்தில் அங்கு அவரால் நடத்தப்படும்.
Murphy's law.

இத்தனை காலமாக இல்லாமல் இப்போது
மனிதகுலம் அழியும் தருவாயில்  இருக்கும்போது, திடீரென ஒரு வாம்ஹோல் உருவாகி, அது வேற கேலக்ஸிக்கு வழி காட்டுவது எப்படி எதேர்ச்சையாக நிகழ்ந்ததாக இருக்க முடியாதோ, அது போல் இத்தனை காலமாக இல்லாமல்
லாசரஸ் மிஷன் லாஞ்ச் ஆகும் தருவாயில் எங்கோயிருந்த கூப்பர் யாருக்கும் தெரியாத நாசாவின் ரகசிய இடத்துக்கு வந்ததும் எதேர்ச்சையானதாக இருக்க முடியாது என்று கருதுகிறார் பிராண்ட்.
வாம்ஹோலை நமக்காக உருவாக்கிய அவர்களே(they) கூப்பரையும் இங்கு அனுப்பியிருப்பதாக நம்புகிறார்.

அந்த வாம்ஹோல் வழிக்காட்டும் கேலக்ஸியில் ஒரே நட்சத்திர குடும்பத்தை சேர்ந்த 12 கிரகங்களுக்கு, மனித வாழ்வாதாரம் பற்றி ஆய்வு செய்ய 10ஆண்டுகளுக்கு முன்பு 12 விஞ்ஞானிகளை அனுப்பியதாகவும் அவற்றில் மூன்று கிரகங்கள் மனிதர்கள் வாழ தகுதியானவை என்று மூன்று விஞ்ஞானிகள் தகவல் அனுப்பியிருப்பதாகவும் சொல்கிறார் பிராண்ட்.
இந்த மூன்று கிரகங்களுக்கும் சென்று உயிர் வாழ தகுதியான ஒரு கிரகத்தை கண்டறிந்து பூமிக்கு தகவல் அனுப்புவதே லாசரஸ் மிஷனின் இரண்டாவது கட்டம்.
மூன்றில் ஒரு கிரகத்தை கண்டறிந்த பிறகு மிஷனின் கடைசி கட்டம் செயல்படுத்தப்படும்.
இதற்காக இரண்டு திட்டங்களை நாசா வைத்துள்ளது.
Plan A.
இங்குள்ள மக்களை அப்படியே ஒரு ஸ்பேஸ்ஷிப்பில் ஏற்றிக்கொண்டு அந்த வாம்ஹோல் வழியே புதிய கிரகத்துக்கு பயணிப்பது.
ஆனால் அதற்கு புவியீர்ப்பு ஒரு பிரச்சனையாக இருக்கிறது.
அதை சமாளிக்க ஒரு புதிய கட்டுமானம் தேவைப்படுகிறது.
அந்த கட்டுமானத்துக்கான  தியரிட்டிகல் வேலை இன்னும் முடியவில்லை. அதற்கான ஒரு புவியீர்ப்பு சமன்பாட்டை உருவாக்கிக்கொண்டு இருக்கிறார் பிராண்ட்.
அதனால் plan A என்பது சாத்தியப்பட சில வருடங்கள் ஆகும்.

அதற்காக இரண்டாவதாக Plan B என்ற ஒரு திட்டம் இருக்கிறது.
Population bomb - மக்கள்த்தொகை வெடிப்பு.
தற்போது செல்லும் ஸ்பேஸ் ஷிப்பில் ஐந்தாயிரத்துக்கும் அதிகமான கருமுட்டைகள் 900கிலோவிற்கும் குறைவான எடையில் எடுத்து செல்லப்படும்.
புதிய கிரகத்தை அடைந்தவுடன் அதில் பத்து மட்டும் முதலில் அடைக்காத்து வளர்க்கப்படும்.
அந்த பத்தும் வாடகைத்தாயாகி பிற முட்டைகளை வளர்த்தெடுக்கும்.
அடுத்த 30வருடங்களில் இது நூற்றுக்கு மேற்பட்ட மானிடக் குழுக்களாக காலணிகளாக உருவெடுக்கும். இப்படியாக மனிதகுலத்தை புதிய கிரகத்தில் நீட்சிப்பது plan B.

கூப்பருக்கு மனித குலத்தை பாதுகாப்பது பற்றியெல்லாம் கவலையில்லை.
அவன் தன்னை ஒரு ஏசுவாக கருதிக்கொண்டு லாசரஸுக்கு உயிர்க்கொடுக்க ஒப்புக்கொள்ளவுமில்லை.
அவர்கள்(they) தன்னை(கூப்பரை) தேர்ந்தெடுத்திருப்பதாக பிராண்ட் உணர்ந்தது போல் கூப்பர் உணரவுமில்லை(partially).
அவன் சுயநலமாக தன் குழந்தைகளுக்காக அவர்கள் எதிர்காலத்துக்காக மட்டுமே இந்த மிஷனை ஏற்றுக்கொள்கிறான்.
அதறால் Plan B பற்றி கேட்டதும் முதலில் தன் குழந்தைகள் பற்றி மட்டுமே சிந்திக்கிறான்.
என் குழந்தைகளை இங்கேயே விட்டுவிட்டு போக போகிறோமா என்று கேள்வி எழுப்புகிறான்.
இன்னும் முடிவடையாத இந்த சமன்பாட்டை நம்பி தன் குழந்தைகளை தனியே விட்டுவிட்டு வேறு கிரகத்திற்கு செல்வதா என்று கோவப்படுகிறான்.

ஆனால் பிராண்ட் உறுதியாயிருக்கிறார்.
தன்னை நம்பும்படி பணிக்கிறார்.
நீ திரும்பி வரும் முன் தான் இந்த சமன்பாட்டை தீர்த்து plan Aவை சாத்தியப்படுத்துவதாக உறுதியளிக்கிறார்.

தன் பயணத்தை பற்றி மாமனார் டோன்ல்டிடம் சொல்கிறான் கூப்பர்.
பயணத்தின் அவசியத்தையும் ஆபத்தையும் உணர்கிறார் டோனல்ட்.
அதனால்
செல்வதற்கு முன் மர்ஃபியை சமாதானம் செய்யும்படி சொல்கிறார்.
உன்னால் முடியாத காரியம் எதையும் அவளுக்கு செய்வதாய் உறுதியளிக்காதே சத்தியம் செய்யாதே என்கிறார்.
இதுவே படத்தின் மூலக்கதையாகவும் அமைகிறது.
ஒரு தந்தை தன் மகளுக்கு கொடுத்த சத்தியத்தை காப்பாற்ற எந்த எல்லை வரை  செல்கிறான்,
எந்த எல்லை வரை, எத்தனை காலம் தன் தந்தையின் சத்தியத்தை நம்பி ஒரு மகள் காத்திருக்கிறாள் என்பதே இந்த படத்தின் கதை.

எல்லா பெற்றோரும் இறந்த பிறகு தன் குழந்தைகளின் மனதில் நீங்கா நியாபகங்களாகின்றனர்.
பிரிவுக்கு பின் பெற்றோருக்கும் குழந்தைகளுக்கும் இடையேயுள்ள மிகப்பெரிய பிணைப்பு இதுவாக தான் இருக்கிறது.
ஞாபகங்கள் - memories.
முன்னோர்களை எப்போதும் நினைவில் வைத்திருத்தல் என்பது மேலை நாடுகளில் ஒரு மிகப்பெரிய செண்ட்டிமெண்ட்டாகவே இருக்கிறது.
இந்தியாவிலும் தான்.
ஆனால் அவற்றை ஈமச்சடங்கு திதி என்று இந்தியர்களை போல் ஒரு சம்பிரதாயமாக செய்யாமல் அமெரிக்கர்கள் அதை உணர்வால் கையாள்கிறார்கள்.
தான் திரும்பி வரும்வரை தன்னை
அப்படியொரு நீங்கா நியாபகமாக காத்திருக்கும்படி சொல்கிறான் கூப்பர்.
தன் அலமாறியிலிருந்து கீழே விழும் புத்தகங்களின் மோர்ஸ் குறிப்புகள் STAY என்று சொல்கிறது.
அதனால் தன்னை விட்டு செல்ல வேண்டாம் என்கிறாள் மர்ஃபி.
மர்ஃபிக்கு நாட்காட்டியுடனான ஒரு கடிகாரத்தை பரிசளிக்கும் கூப்பர், தான் ஒளியின் வேகத்தில் பயணிக்கும்போதோ கருந்துளைக்கு அருகில் செல்லும்போதோ தனக்கு நேரமானது மெதுவாக நகரலாம்.
தான் திரும்பி வரும்போது இருவருக்கும் ஒரே வயது கூட இருக்கலாம். அந்த அற்புதத்தை காண எனக்காக காத்திரு என்கிறான்.
எந்த வயதிலுமானால்.... திரும்பி வருவாய் என்றோ, எப்போது திரும்பி வருவாய் என்றோ உனக்கே நிச்சயமாய் தெரியவில்லை என கோவப்படுகிறாள் மர்ஃபி.
கடைசி வார்த்தையாய் I am coming back என்று சொல்லி செல்கிறான் கூப்பர்.
மர்ஃபி கடைசியாக கூப்பரிடமிருந்து கேட்டது இதை தான்.
I'm coming back என்ற உறுதியை கூப்பர் வெறுமென சமாதானத்திற்காக சொல்லிச் செல்லவில்லை.
அதற்கு முன்பாக டோனல்ட் சொல்கிறார் உன்னால் முடியாததை அவளுக்கு உறுதியளிக்காதே என்று.
அதனால் நன்கு யோசித்தே தான் அப்படியொரு சத்தியத்தை மகளுக்கு அளிக்கிறான் கூப்பர்.
அப்படியொரு சத்தியத்துடன் தான் மகளிடமிருந்து விடைபெறுகிறான்.
நம்பிக்கையுடனான காத்திருப்பும் கதையும் தொடங்குகிறது..

பிரிவுடன் பயணப்படுகிறான் கூப்பர்.

அடுத்து வருவது one of the best scene in movie.
Jumps cut of Rocket launch & cooper leaving home.
Brilliant & emotional cuts.

கூப்பர், அமிலியா பிராண்ட், ரோமிலி, டாய்லோடு டார்ஸ் & கேஸ் என்ற இரு ரோபோட்டுகளும் பயணத்துக்கு தயாராகின்றன.
படத்தில் கதாபாத்திரங்களாக வெகுவாக ஈர்த்தது டார்ஸ்&கேஸின் பாத்திர அமைப்பு.
ஒரு Artificial intelligenceக்கென பல வரையறைகள், characterizationகள் உண்டு.
ஒரு chatbot என்பதை தாண்டி சுயமாக முடிவெடுத்தல், கட்டளையை பின்பற்றுதல் என்றெல்லாம் அசிமோ விதிகளுக்கு உட்பட்டு அவை ரோபோட்டுகளாக துல்லியமாக இங்கே வடிவமைக்கப்பட்டிருக்கும்.
எல்லாவற்றிற்கும் மேலாக அதன் humour & philosophy thought.
அதற்கு பயணத்தின் முதல் காட்சியிலேயே வரும் சில வசனங்களை எடுத்துக்காட்டாக சொல்லலாம்.
கலன் வளிமண்டலத்தை தாண்டுகிறது.
அப்போது வரை எல்லா கன்ட்ரோலும் டார்ஸிடம் தான் இருக்கிறது.
இனி டார்ஸ் நினைத்தால் அந்த கலனை எப்படி வேண்டுமானாலும் இயக்கலாம். உடனிருக்கும் நால்வரை என்ன வேண்டுமோ செய்யலாம்.
தன்னுடைய இந்த பவரை சொல்லும் விதமாக "என் ரோபோட் காலணிக்கு உங்களை வரவேற்கிறேன்" என்று கிண்டல் செய்கிறது.
ஒரு விதத்தில் நல்ல சமத்து பிள்ளையாக வடிவமைக்கப்பட்டு இருக்கும் டார்ஸ்,
தன்னுடைய கிண்டல் ஒருவருக்கு பிடிக்கவில்லை என்று தெரியவந்தால் அவர்களை கேலி செய்ய மாட்டேன் என்கிறது.
ஒரு செயலுக்கான ரியாக்ஷனை எதிர் இருப்பவரிடமிருந்து புரிந்துக்கொள்வது என்பது ஒரு உணர்வு ஒரு அறிவு.
வெறும் சென்சார்களாலோ face detection & comparisonகளாலோ அதை எளிதில் புரிந்துக்கொள்ள முடியாது.
அந்த உணர்வு புரிதல் என்பது மனிதர்களுக்கேயான பொக்கிஷம் என்று கூட சொல்லலாம்.
அதை மட்டுமே ஒரு ரோபோட்டை செய்ய வைப்பதென்பதே ஒரு நோபல் பரிசுக்கான தகுதியுடைய கண்டுபிடிப்பு.
அப்படியொரு செட்டிங் டார்ஸுக்கு வழங்கப்பட்டு இருக்கிறது.
அதன் philosophical அறிவு அதற்கு மேல் சிலிர்க்க வைக்கிறது.
ஒரு காட்சியில்
உனக்கு செட் செய்யப்பட்ட நேர்மையின் அளவு என்ன என்று கேட்கிறான் கூப்பர்.
அதற்கு டார்ஸ் 90% என்கிறது.
ஏன் 100% இல்லை என்பவனிடம் "எந்த மனிதன் 100% நேர்மையானவனாக இருக்கிறான் நான் இருப்பதற்கு? அதுவுமில்லாம 100% நேர்மையா இருந்தா உங்கள் போல மனுஷங்கள சமாளிக்க முடியுமா?"என்கிறது.

எட்மண்டும் அமிலியுவும் காதலர்களா என்று கேட்கும் கூப்பரிடம் எனக்கு தெரியாது என்கிறது.
உனக்கு தெரியாது என்று‌ சொல்லும் பதில்  உன் 90% நேர்மையிலிருந்து சொல்கிறாயா அல்லது 10% விலக்கிலிருந்து சொல்கிறாயா என்றதற்கு , "சும்மா நீ கேக்குறதுக்கெல்லாம் என்னால பதில் சொல்லிட்டு இருக்க முடியாது என் இஷ்டத்துக்கு இருக்குறதுக்கும் எனக்கு செட்டிங் உண்டு" என்று முகத்தில் அறைகிறது.
என்ன தான் chatbotடாகவும் assistbotடாகவும் இருந்தாலும்
ஒருவரின் privacyயை எந்த அளவுக்கு gossip பேசலாம் என்பதற்கான அளவுகோலை ஒரு AIயாக டார்ஸ் நன்றாக புரிந்து வைத்திருக்கிறது அல்லது அப்படியாக வடிவமைக்கப்பட்டிருக்கிறது.
அசிமோவை தாண்டி டார்ஸ் ஒரு ரோபோட்டாக மட்டுமின்றி சிறந்த மனிதனாகவும் இருக்கிறது என்பதற்கு இந்த காட்சி.
ஆனால் கூப்பரோ "உனக்கு தெரிஞ்சத நீ என்கிட்ட சொல்லாம மறுக்குற ஆனா உன்னால அது பத்தி தெரியவே தெரியாதுனு மறைக்க முடியல" என்று சொல்லி உன்னால் ஒரு perfect human ஆகவே முடியாது என்று சொல்லி செல்கிறான்.

பத்து எண்றதுக்குள்ள படத்தில் ஒரு காட்சி வரும்.
தனியாக தொலைந்து போன சமந்தா மைக்கில், தன்னோடு வந்த 40 பேரும் தொலைந்துவிட்டதாகவும் தான் பத்திரமாக இருப்பதாகவும் சொல்வார்.
அது ஒரு பாதுக்காப்பு உணர்வு.
பாதுகாப்பாக இருப்பவர் ஒருவராக இருந்தாலும் தான் பத்திரப்படுத்தப்பட்டவர் என்றும், பாதுகாப்பற்றவர்கள் கூட்டமாக இருந்தாலும் அவர்கள் பத்திரமற்றவர்கள் என தோண்ற வைக்கும் உணர்வு.
போராட்டங்களில் போலீஸார் கையால் தடியடி வாங்கும் 100 பேரை விட வீட்டில் அமர்ந்திருக்கும் ஒற்றை ஆளான நான் பாதுகாப்பாக இருக்கிறேன் என நம்புவது.
புதிய கிரகத்தை வாழ்வியலை தேடி செல்லும் கூப்பர், பூமியில் பாதுகாப்பற்று இருப்பவர்களை எதிர்காலம் கேள்விக்குறியாகி இருப்பவர்களை எண்ணி ஸ்பேஸிலிருந்து கைக்காட்டி அமிலியாவிடம் பூமி தனிமையில் இருக்கிறது என்கிறான்.

பயணம் தொடர்கிறது.
Enduranceஉடன் இணைந்தபடி சனி கிரகம் நோக்கி பயணிக்கின்றது கலன்.
சனியை அடைய எடுக்கும் இரண்டு வருட காலத்துக்கான உணவு காற்று எனர்ஜி மற்றும் தனிமையை மிச்சப்படுத்த அனைவரும் hyper sleep உறக்கத்துக்கு செல்கின்றனர்.
டார்ஸும் கேஸும் கலனின் பொறுப்பை ஏற்கின்றன.

இரண்டு வருடங்களுக்கு பிறகு வாம்ஹோலை அடைந்த ஷிப்,
வாம்ஹோலின் சுற்றுவட்டப்பாதையை அடைந்து உள்ளே நுழைந்து மறுபக்கத்தை சேர்கிறது.
புதிய கேலக்ஸியை அடைந்த விஞ்ஞானிகள் இன்னொரு பிரச்சனையை சந்திக்கின்றனர்.
Mann, Edmund, miller என்ற மூன்று விஞ்ஞானிகளில் யாருடைய கிரகத்துக்கு முதலில் செல்வது என்பது குழப்பம்.
மில்லர் உயிரியலாளர் & எட்மண்ட் ஒரு  இயற்பியலாளர்(particle physicist). மேன் இவர்கள் அனைவருக்கும் தலைமை விஞ்ஞானி.
கிரகங்களின் வாழ்வாதாரம் பற்றிய கணிப்பு & ஆராய்ச்சியில் மூவரின் கணிப்புமே மிகச்சரியாக இருக்க 100% வாய்ப்பிருக்கிறது.
மூவரில் இருவரிடமிருந்து இன்னும் தகவல்கள் வந்துக்கொண்டிருக்கின்றன.
ஆனால் எட்மண்டிடமிருந்து 3ஆண்டுகளாக எந்த தகவலும் இல்லை.

மில்லர் கிரகம் மூன்றில் மிக அருகில் இருக்கிறது.
ஆனால் அதில் இருக்கும் சிக்கல் அது(வும் மேன் கிரகமும்) கர்கன்சுவா என்கிற கருந்துளைக்கு மிக அருகில் இருக்கிறது.
கருந்துளையின் அதிக புவியீர்ப்பு காரணமாக அந்த கிரகத்தில் நேரமானது பூமியை காட்டிலும் மிக மெதுவாக நகரும்.
அதாவது மில்லர் கிரகத்தில் ஒரு மணிநேரமானது பூமியில் கிட்டத்தட்ட ஏழு ஆண்டுகளுக்கு சமம்(approximately).
மில்லர் கிரகத்துக்கு சென்று திரும்புவதற்குள் அதிக வருடங்கள் கடந்துவிட்டால் ஏற்கனவே அழித்துக் கொண்டு இருக்கும் பூமி அதற்குள் அழிவின் விளிம்புக்கு சென்றிருக்கவோ அழிந்தே போயிருக்க கூட வாய்ப்பிருக்கிறது.
அதனால் மில்லர் கிரகம் மனிதர்கள் வாழ தகுதியான கிரகமாகவே இருந்தாலுமே கூட அது பின்பு பயனற்றதாக போகலாம்.
தூரமாக இருக்கும் மற்ற இரு கிரகங்களுக்கு செல்வதில் எரிபொருள் மட்டுமே செலவாகிறது ஆனால் மில்லர் கிரகத்தில் மற்ற கிரகங்களுக்கு செல்வதை காட்டிலும் அதிகம் நேரம் செலவாகிறது.
எனவே எரிபொருளை முக்கியமானதாக கருதுவதை போலவே நேரத்தையும் முக்கியமானதாக கருத வேண்டும் என்று மில்லர் கிரகத்துக்கு முதலில் செல்லும் முடிவை கூப்பர் ஆதரிக்கவில்லை.
ஆனால் மூன்று கிரகங்களில் வாழ்வாதாரம் இருப்பதற்கான சாத்தியக்கூறுகள் மில்லர் கிரகத்திலேயே அதிகம் இருப்பதாக வாதிடுகிறான் டாய்ல்.
எனவே அனைவரும் ஒரு மனதாக மில்லர் கிரகத்துக்கு முதலில் செல்வதாய் தீர்மாணிக்கின்றனர்.

கருந்துளையின் சுற்றுவட்டப் பாதையில் பயணித்தால் எரிபொருள் மிச்சமாகும் ஆனால் கால வேறுபாடு காரணமாக நேரம் விரயமாகும்.
எனவே
கருந்துளையின் ஈர்ப்பில் சிக்காதவாறு சுற்றிக்கொண்டு போய் மில்லர் கிரகத்தை அடைந்து
கருந்துளை மற்றும் மில்லர் கிரகத்தின் காலவேறுபாட்டில் சிக்காதவாறு
என்டியூரன்ஸை வெளியே நிறுத்திவிட்டு மில்லர் கிரகத்துக்கு செல்லலாம்.
இதனால் எரிபொருளையும் நேரத்தையும் கணிசமாக சேமிக்கலாம் என்கிறான் கூப்பர்.

அப்படி செய்வதானால் தான் என்டியூரன்ஸிலேயே தங்கி வாம்ஹோலிலிருந்து எடுத்த கிராவிட்டி டேடாவை ஆய்வு செய்வதாகவும் அது பிரஃபசர் பிராண்டுக்கு உதவியாக இருக்குமெனவும் கூறுகிறான் ரோமிலி.
ரோமிலிக்கு துணையாகவும் என்டியூரன்ஸ் பைலட்டாகவும் டார்ஸை பணியமர்த்துகிறான் கூப்பர்.
தாம் திரும்பி வரும்வரை
கருந்துளையின் சுற்றுவட்டப் பாதையில் பயணித்து எரிபொருளை சேமிப்பதோடு தங்களுக்காக காத்திருக்கம்படி டார்ஸிடம் சொல்கிறான்.
டார்ஸும் ரோமிலியும் என்டியூரன்ஸில் இருக்க
டாய்ல் கூப்பர் அமிலியா கேஸ் நால்வரும் மில்லர் கிரகத்துக்கு செல்கின்றனர்.

சுற்றுவட்டப் பாதையில் சுழன்று கிரகத்தின் வளி மண்டலத்தை அடைவது இன்னும் நேரத்தை விரயமாக்கும் என்பதால் நேரடியாக வளிமண்டத்துள் நுழைய முடிவெடுக்கிறான் கூப்பர்.
இது ஒரு முரட்டுத்தனமான தரையிறங்கும் உத்தி.
கொஞ்சம் தவறினாலும் பெருவிபத்து ஏற்படலாம்.
கிரத்தின் ஈர்ப்புவிசை ரேஞ்சரை அழுத்துகிறது.
அதிவேகத்தில் தரையை நோக்கி செல்வதை தடுக்க thrustersஐ இயக்க பணிக்கிறது கேஸ்.
(Thrusters என்பது கலனை முன்னோக்கி உந்தி தள்ளும் எந்திரம், தரையிரங்குதலில் thrustersஐ எதிர்திசையில் திருப்புவதன் மூலம் கலனின் வேகத்தை கணிசமாக மற்றும் அதிகவேகத்தில் குறைத்து அதை ஒரு பிரேக்காக பயன்படுத்தலாம்)
ஆனால் thrustersஐ இயக்குவதன் மூலம் அதிக எரிபொருள் வீணாகும் எனவே air brakeஐ பயன்படுத்துவதாக சொல்கிறான் கூப்பர்.
அதிவேகத்தில் air brakeஐ பயன்படுத்துவது பெரிய விபத்தை கூட ஏற்படுத்தலாம்.
அதையும் தாண்டி சமாளித்து ரேஞ்சரை தரையிறக்குகிறான்.

Dr.miller தகவல் அனுப்பிய இடத்தில் இறங்கியிருக்கிறது கலன்.
கிரகத்தில்
எங்கு பார்த்தாலும் நீர் மட்டுமே நிரம்பியிருக்கிறது.
நீர்... நீரை தவிர வேறு எதுவுமே இல்லை...
அவற்றுக்கு நடுவே மில்லரின் ரேஞ்சர் உடைந்து கிடக்கிறது.
மில்லரிடமிருந்து தகவல் வந்த பீக்கனை/probe தேடுகிறாள் அமிலியா.
சுற்றியுள்ள அளவில்லா நீரை பார்த்த பின்னரும்
அதிலிருந்து எதாவது செய்தி கிடைக்கலாம், மில்லர் நமக்காக எதாவது செய்தியை விட்டு சென்றிருக்கலாம் என நம்பி அதை தேடுகிறாள்.
அதற்குள் வேறொரு பிரச்சனை.
மலையளவிலான ஒரு பேரலை அவர்களை நோக்கி வந்துகொண்டு இருக்கிறது.
இருவரையும்
ரேஞ்சருக்கு திரும்பும் படி சொல்கிறான் கூப்பர்.

தொடர்ந்து பீக்கனை தேடும் அமிலியாவை கேஸ் தூக்கிக்கொண்டு ரேஞ்சருக்கு விரைக்கிறது.
பேரலையில் சிக்கி உயிரிழக்கிறான் டாய்ல்.
ரேஞ்சரின் இஞ்சின் தண்ணீரில் மூழ்கி தற்சமயம் செயல்படுத்த முடியாதவாறு தடைப்படுகிறது.
(அந்த காட்சியில் ஒரு விஷயத்தை கவனிக்கலாம், அமிலியாவை தூக்கிக்கொண்டு வந்த கேஸ் அமிலியாவை உள்ளே அனுப்பிவிட்டு டாய்லுக்காக காத்திருக்காமல் தானும் உள்ளே புகுந்துக்கொள்கிறது.
உயிர் பிழைத்திருக்க வேண்டுமென்ற உணர்வு கேஸுக்கு இருக்கிறது அதனாலே இரண்டாவது ஆளாக தானும் உள்ளே நுழைந்துக்கொள்கிறது என்று இதை எடுத்துக்கொள்ளலாம்.)

அமிலியாவிடம் கோவப்படுகிறான் கூப்பர்.
நீ வீட்டுக்கு செல்வதில் மட்டுமே குறியாக இருந்தாய் மிஷனை பற்றி யோசிக்கவேயில்லை என்கிறாள் அமிலியா.

மில்லர் பூமிக்கு அனுப்பியது ஒரேயொரு செய்தியை தான்.
அது இங்கே மனிதர்கள் வாழ முடியாது என்பதாக கூட இருக்கலாம் அது தெரியாது.
காலவேறுபாடு காரணமாக அது குறிப்பிட்ட இடைவெளியில் தொடர்ந்து பூமிக்கு எதிரொலித்து வந்துக்கொண்டு இருந்திருக்கிறது.
இன்னும் சொல்லப்போனால் மில்லர் இந்த கிரகத்தில் செலவிட்டது சில மணிநேரங்கள் மட்டுமே, அதிகபட்சம் 2மணிநேரத்துக்கு முன்பு அவர் இங்கே தரையிறங்கி ஒரு மணிநேரத்துக்கு முன்பு இறந்திருக்கலாம். அதற்குள் அவரால் பெரியதாக எதையும் ஆய்வு செய்திருக்க முடியாது.
காலவேறு மிகப்பெரிய குழப்பத்தை உருவாக்கி நம்மை இங்கே சிக்க வைத்திருக்கிறது என்று புரிகிறான் கூப்பர்.
அண்டத்தை புரிந்துக்கொள்ளும் அளவுக்கு நாம் இன்னும் முன்னேறவில்லை என்று கொதிக்கிறான்.
கருந்துளைக்கு அருகிலோ சுற்றியோ பறந்து வீணடிக்கப்படும் பல ஆண்டுகளை எப்படியாவது சமன் செய்துவிட முடியாதா என்று ஆதங்கப்படுகிறான்.

பொதுவாகவே நோலன் சகோதரர்களின் எழுத்தாக்கம் கதையின் ஒவ்வொரு கட்டத்திலும் கதையை பற்றிய நம் புரிதலை படிப்படியாக வெவ்வேறாக மாற்றிக்கொண்டே செல்லும்.
அதன்படி கூப்பரின் ஆதங்கத்துக்கு பதில் சொல்வதாய் இருக்கும் அமிலியாவின் விளக்கம் கதை பற்றிய நம் புரிதலின் முதல் தொடக்கப்புள்ளி.
இந்த விளக்கமே கதையின் கருவும் கூட.
இந்த விளக்கமே ஒவ்வொரு இடத்திலும் ஒவ்வொன்றாக கதையில் evolve ஆகிறது.

Time is relative.
நம்முடன் தொடர்புக்கொள்ளும் they ஈர்ப்புவிசை மூலம் நம்மிடம் பேசுகின்றனர், அவர்கள் இருக்கும் வேறு பரிணாமத்தில் சாத்தியப்படும் இது நம்மால் முடியாது.
"இரு பரிணாமங்களிடையே பயணிக்க சாத்தியமுள்ள ஒரே சக்தி ஈர்ப்பு (gravity) மட்டுமே."
அதனால் ஈர்ப்பு விசையை தாண்டி வேறெதாலும் வேறு பரிணாமத்தில் ஒன்றிலிருந்து மற்றொன்றுக்கு பயணிக்க முடியாது.. அதே போல் இந்த பரிணாமத்தில் இருக்கும் நாம் ஒரு காலமும் காலத்தில் பின்னோக்கி பயணிக்க முடியாது என்கிறாள் அமிலியா.

இந்த ரிலேட்டிவிட்டி தியேரி எனக்கு தெரியும் ஆனால் என் மகளுக்கு தெரியாது.
அவள் இயற்பிலை அறிந்துக்கொள்வதற்கு முன்/பதில் அன்பை அறிந்துக்கொண்டவள்.
என் மீதும் சமூகம் மீதும் நம்பிக்கை வைக்க கற்றுக்கொண்டவள்.
ஒரு தந்தையாக தன் மகளுக்கு தன்னம்பிக்கையுடனான ஒரு குழந்தை பருவத்தை தர நினைத்த கூப்பர் இந்த உலகம் அழிந்துக்கொண்டு இருக்கிறது என்ற உண்மையை கூட அவளுக்கு சொல்லி வளர்த்திருக்கவில்லை.
இங்கு நடந்த ஒரு சிறு தவறு என் மகள் உட்பட அத்தனை மனித குலத்தையும் நம்பிக்கையின்மையில் ஆழ்த்தப்போகிறது என கலக்குகிறான் கூப்பர்.

மில்லர் கிரகத்திலிருந்து திரும்பி எண்டியூரன்ஸுக்கு செல்லும்போது பூமியின் காலத்தில் 23 ஆண்டுகளை கடந்திருக்கின்றனர் அமிலியாவும் கூப்பரும்.
உடைந்துப்போகிறான் கூப்பர்.
23 வருடங்களாக தூங்காமல் கருந்துளையை ஆராய்ந்து பெரும் தகவல் திரட்டியிருப்பதாக சொல்கிறான் ரோமிலி.
ஆனால் அதை ப்ரஃபசர் பிராண்டுக்கு அனுப்ப முடியவில்லை.
ஆனால் பூமியிலிருந்து அவர்கள் அனுப்பும் செய்தி வந்துக்கொண்டு தான் இருக்கிறது.
(நம் சூரிய மண்டலத்துக்கும் வாம்ஹோலுக்கு மறுபக்கம் இருக்கும் இந்த கேலக்ஸிக்கும் பல கோடி ஒளியாண்டுகள் தூரம் இருக்கலாம் ஆனால் பூமியிலிருந்து வரும் செய்திகள் எப்படி வருகின்றன அவையும் வாம்ஹோல் வழியாகவே பயணிக்கின்றனவா  என்பது மாதிரியான தெளிவான குறிப்புகள் எங்கும் இல்லை)

அடுத்து வரும் இந்த சம்பவம் படத்தின் gem of golden crown என்று சொல்லலாம்.
23 ஆண்டுகளில் பூமியிலிருந்து டாம் அனுப்பிய அத்தனை வீடியோ மெசேஜுகளையும் காண்கிறான் கூப்பர்.
முதல் வீடியோவில் தான் பள்ளியை முடித்து விட்டதாகவும் ஒரு பெண்ணை காதலிப்பதாகவும் திறமையாக விவசாயம் செய்து வருவதாகவும் சொல்லும் டாம், 10 அல்லது அடுத்து சில ஆண்டுகளுக்கு பிறகு தனக்கும் காதலி லூயிஸுக்கு பிறந்த குழந்தையை கூப்பருக்கு காட்டுகிறான்.
அங்கேயே பாதி உடைந்து போகிறான் கூப்பர்.
மறு வீடியோவில் தன் மகளும் தாத்தாவும் இறந்து விட்டதாக சொல்கிறான் டாம்.
நீங்கள் திரும்ப வர மாட்டீர்கள் என்று தன்  மனைவி உட்பட அனைவரும் சொல்கின்றனர்.
பூமி அழிந்துக் கொண்டிருக்கிறது.
தன் அன்பு மகளின் மரணம் அதை விட அதிகம் வதைக்கிறது என்று கலங்குகிறான்‌.
எப்படியாயினும் நீங்கள் திரும்ப வருவீர்கள் என்று கடைசி வரை நம்பிக்கொண்டே இருப்பேன் என்கிறான்.
தந்தையின் உயிருக்கு உத்தேசமில்லாத பிரிவு, மகளின் மரணம், வாழ்வாதார சறுக்கல் என பல மன உளைச்சல்களால்
கிட்டத்தட்ட எல்லாமே ஒரு முடிவுக்கு வந்துவிட்டதாக தன்னம்பிக்கை இழந்தவனாக தவிக்கிறான் டாம்.
இத்தனை துயரங்களுக்கும் தானும் ஒரு காரமாகிவிட்டோமேயென உடைகிறான் கூப்பர்.

கடைசியாக 35+ வயதான மர்ஃபி பேசுகிறாள்.

நீங்கள் தொடர்பில் இருந்தபோது கோபத்தில் உங்களிடம் பேச விரும்பாதிருந்தேன்.
ஆனால் நீங்கள் தொடர்பற்று போன பிறகு..... (நீங்க காணாம போனதுக்கப்பறம் உங்கள ரொம்ப மிஸ் பண்ணேன் உங்க கிட்ட பேசனும்னு நினைச்சேன் என்று சொல்ல வந்து சொல்லாமல் - பேச்சுக்கு நடுவிலான அந்த ஒரு pauseக்கு அதுவே பொருள்)
அதன் பின்பும் உங்களிடம் பேச எனக்கு தோன்றவில்லை.
ஆனால் இன்று பேசுவதற்கு ஒரு காரணம் இருக்கிறது.
இன்று என் பிறந்தநாள்.
என்னை நீங்கள் பிரிந்து சென்றபோது சொல்லி சென்றது இது...
உனக்கு என் வயது ஆகும்போது அதே வயதில் நான் பக்கத்தில் இருப்பேன் என்றீர்கள்.
நீங்கள் பிரிந்து சென்றபோது உங்களுக்கு என்ன வயது இருந்ததோ  அதே வயது எனக்கு இப்போது ஆகிறது.
நீங்கள் திரும்பி வர சரியான நேரம் வந்துவிட்டது என்று கூறி வீடியோவை அணைக்கிறாள்.

இத்தனை காலம் தந்தையிடம் பேசாது இருந்திருக்கலாம். ஆனால் பிடிக்காது இல்லை.
அதற்கு மர்ஃபியிடம் ஒரு காரணம் இருந்தது.
தந்தை அளித்த சத்தியம் தான் அது.
தான் திரும்பி வருவதற்கு ஒரு காலத்தை எல்லையாக சொல்லி செல்கிறான் கூப்பர்.
அந்த காலம் வரும் வரை தன் தந்தையை உலகுக்கு தத்து கொடுத்திருப்பதாக கருதுகிறாள் மர்ஃபி.
அந்த காலம் வரை தந்தையை தொந்தரவு செய்யாதும் இருக்கிறாள்.
அந்த காலத்துக்குள் தந்தை நிச்சயம் திரும்பி வந்துவிடுவாரென நம்புகிறாள்.
குறிப்பிட்ட அந்த நாள் வந்த பிறகு
தந்தை கொடுத்த சத்தியத்தின் மீது கோபம் கொள்கிறாள்.
இத்தனை நாட்களாக பேசாது இருந்திருந்தாலும் அவள் தந்தை மீது வைத்திருந்த நம்பிக்கை மட்டும் குறைந்ததாயில்லை.
பெரும் ஏமாற்றத்தை தன் தந்தை தனக்கு வந்துவிட்டதாக கருதுகிறாள்.
கோபம் கண்ணீராக கனக்கிறது.

இத்தன நாளா நீ ஏன் இன்னும் வரலனு உன்ன நான் கேக்கல... நீ கண்டிப்பா வருவேனு நம்பிட்டு நான் பாட்டுக்கு இருந்துட்டேன்.... ஆனா அதை கேட்க இப்ப நேரம் வந்துடுச்சு, எப்ப வர? என்பது தான் மர்ஃபி கூப்பருக்கு சொல்லிச் சென்ற செய்தி.

-To be continued...
ராஜ்குமார்@RajiTalks